قناه الجزيره

[Muhamed]

طبعا يا جماعه كلنا بنتفرج على قناه الجزيره او على الاقل سمعنا عنها

والقناه دى بقه يا جماعه محيرانى بجد لانى مش عارف بجد اتجاهها ايه لان فيها كتير من المنتاناقدات

يعنى صاحبها امير قطرى فالطبيعيى انها ماشيه تبع سياسته اللى معروف بالطبع سياسته تبع مين

طب وموضوع بن لادن انا سمعت ان فى بعض دول الخليج بتدفعله فلوس علشان ميعملش نشاط على ارضها وان قطر منهم بس دى بقه وخده حق البث الحصرى لشرايطه واخباره طبعا ده لو حقيقى تبقى مسخره

ومنين هيا قاعده تشتم فى اسرائيل وتجيب مناظر محدش بيقدر يجبها من جوه فلسطين واسرائيل لصور مقتل المدنيين وشغالين انتحاب ان اسرائيل بتهاجم مقر القناه كل فتره ومنين انها القناه العربيه الوحيده اللى شفتها بتعمل حوارات مفتوحه وعلى الهواء مع قواد الجيش الاسرائيلى ويسيبوهم يتكلموا (طب ازاى)

علاقتها بمصر


طبعا كلنا عارفين علاقه الجزيره ايه بالحكومه المصريه والاكسوفين اللى بيتحط كل شويه بين الاتنين القناه تجيب ناس تشتم فى الحكومه والحكومه حاطه التلفزيون و الجرايد لدرجه ان احد الجرائد القوميه عملت مقاله كامله عن فضيحه تورط امير قطرى فى عمليه سلاح فاسد اشترته قطر من امريكا وده كان رد على الجزيره

طبعا انا لا مع ده ولا مع ده

المهم انا عايزكم تلاحظوا كده مين اكتر دوله فى العالم الجزيره بتحط اخبار متعلقه بيها اكيد امريكا (خرجوا العراق وفلسطين بره العمليه دى)

طب مين تانى دوله يا حلوين اه تانى دوله هيا مصر

لو تابعتوا الجزيره خلال اسبوع وباسيطوا على الباره اللى تحت مفيش ساعه بتعدى الا لما تلاقى كلمه مصر ماشيالك بخبر جديد

هل معنى كده ان الجزيره بتعترف ان مصر هيا اهم دوله فى المنطقه طب ليه قاعدين يقطعوا فىها فى كل البرامج؟ وخلاص بقه مصر هيا الفساد المستفحل فى المنطقه وان كل حاجه فى مصر فاسده طب حد كده سمع برنامج او حتى خبر عن مشكله او فساد فى منطقه الخليج وخصوصا دوله القناه نفسها يعنى القناه قطريه ومفيش خبر عن قطر غير فى الاعلانات خلاص باقى الدول العربيه ملايكه واحنا اللى ولاد ..........

ولو بسيطوا على البرامج الحواريه وما اكثرها فى الجزيره مش هتطلعوا منها بحاجه لان فى معظم الاحيان البرنامج بيبقى خناقه وكله معاه الدليل وعليك تعمل حادى بادى علشان تعرف الحقيقه فين


حتى البرامج التاريخيه عن مصر الحمد لله ربنا اكرمنى وعرفت ان مصر اتهزمت فى حرب 73 (الله اكبر)
بجد انا ما بهزرش

القناه المحترمه واخده 3/4 الحوار مع ناس اسرائلين وامريكان والربع للمصرين يا عينى فعلا منتهى العدل

ولو سمعت الكلام هتلاقى ان مصر عبرت وبس وبعد كده اتقطعنا يا حلاوه طب لو احنا اتقطعنا اسرائيل ما كملتش ليه

فانا مش فاهم ايه هوه الهدف الحقيقى من هذه القناه

وعايزين نفتح الحوار وكله يقول رايه فالرأئ يحتمل الصواب او الخطا

[heroshima]

الرابط لايظهر فى الأرشيف

قناة الجزيرة من رأيي الشخصي هي القناة الإخبارية الأولى في العالم أما حكاية انها بتجيب في سيرة مصر فدي حاجة ترجعلها لأن وكفاية أنها بتجيب الحقيقة صريحة بدون أي تشويشات ......... وشكرا

[الطيب احسن]

التناقض اللى انت شايفه ده مش غريب لان شعارها
الراى والراى الاخر
يعنى مثلا لازم نعرف وجهه نظر الارهابييين عشان نعرف ايه وجهه نظرهم

فمن حقها تجيب اللى هى عايزاه من جميع النواحى (امريكا اسرائيل مصر ) اللى هى عايزاه
وارجع واقولك ان احنا بنعرف منها اخبار عن بلدنا عمر التليفزيون المصرى يقدر يجبها
يعنى مثلا لازم نعرف وجهه نظر الارهابييين

[Muhamed]

طب كلام مظبوط لكن اللى مش عارف اجيبله سبب منين اسرائيل بتكره الجزيره ومنين مش هقول محللين لاه دا اثناء الحرب بتاع لبنان كانوا بيجيبوا قواد اسرائلين على الهواء ويتكلموا

مش قادر اوزنها:sly:

[hikmat_zawitay]

يا اخي العزيز: انه قناة اسرائيلي لا اكثر ولا اقل

[الطيب احسن]

اخ ماندوز اليهود طول عمرهم بيدورو على وسائل الاعلام عشان يعملو الحركتين بتوعهم ويثولو ان هم اللى معتدى عليهم وكده يعنى عشان ياثرو على الراى العام العالمى وخاصه العربى

[Muhamed]

كلامك مظبوط اخى الطيب لكن منين اسرائيل كل كام شهر تقتحم مقر الجزيره وتصادر شراط او تعتقل اوقات

وفى نفس الوقت قواد الحرب يطلعوا على نفس القناه ويشرحوا فيها ليه هما عملوا مجزره (على ما افتكر كان فى مره اثناء حرب لبنان جايبين مراسل فى بنان وبيتكلم على المجازر والبيوت اللى اتهدت فوق قانتيها وبعديها لقيت واحده لبسه زى عسكرى تقريبا كانت المتحدثه الرسميه للجيش الاسرائيلى وكانت بتتكلم من داخل مقر الجزيره فى القدس فالا ترى ان فى ذلك قمه التناقد :sly:

وكمان سبك من ديه انا عايزك تتفرج على الحلقه اللى هتتزاع فى زكرى حرب اكتوبر لانهم بيكروها كل سنه علشان تعرف ان مصر اتقطعت فى حرب 73 وكمان كان فيه جسر جو روسى معمول لنا وان المصريين كانوا خونه وباعوا الجبهه السوريه (رغم ان فى الحرب وعلى لسان قائد القوات المصريه فى كتابه زكريات حرب اكتوبر زكر ان مصر خسرت 200 دبابه فى يوم واحد نتيجه اومر صدرت لهم بالتقدم للضغط على اسرائيل دون غطاء جوى(دفاع جوى يعنى) ورغم ذلك برضه احنا خونه وعلشان نبقى عادلين اصبر كمان يومين وهيتيجى الحلقه واتفرغ على كلام كيسنجر وبيريز(اكتر اتنين طلعوا فى البرنامج ده وقلى رايك)